Ук хемчегни Республиканың улусчу чогаадылга болгаш дыштанылга төвүнүң эрттирип турары Республика чергелиг "Колыбель моя. Кавай" деп кавай культуразының фестивалынга тураскааткан. Делгелге Уруглар хүнүнге тураскааткан хемчеглер-биле кады "Бай-Тайга" стадионунга болуп эрткен.
Делгелгеге Кара-Хөл сумузунуң хүндүлүг хоочун ус-шевери, Бай-Тайга кожууннуң улустуң мастери Роза Сереновна Доңгактың ажылдары делгеттинген. Ус-шевер бодунуң кылган ажылдарын кижи бүрүзүнге таныштырган, ол дээрге чаш уругларга алгы-кештен даараан идик-хеп, бөрттер, чаштарның камгалалдары, база делгелгениң кол өзээ - чаа чазаан тыва кавай.
Ол ышкаш Роза Сереновна - Бай-Тайга кожууннуң “Мөңгүлек” аттыг ыры-хөгжүм болгаш чечен-чогаал каттыжыышкынның кежигүнү болур, чаа чогааткан шүлүүн бистиң номчукчуларга сонуургаттывыс.
“Тыва кавай”
Эрте шагдан тыва чонум
Эди болур - сүзүглелдиг
Өгбелерден дамчып келген
Өндүр ыдык кавайы бар.
Төрүттүнген хензиг чаштың
Дөжээ, орну, уязы боор
Тыва ава төлүн чайгаан
Тывызыы хөй - тыва кавай.
Ус-шевер холу-биле
Уран-мерген угаан-биле
Хензиг чаштың өзеринге
Кедергей-ле таарып кылган.
Өлден, шыктан челбинмес дээш
Өдек чадып кургайлап аар
Энчек, алгы, чөөктен шүмнээн
Эптиг, чылыг тыва кавай.
Чайның изиинде, кыжын соокта
Таарыштыр эптей шарыыр
Чымчак пөштен чазап кылган
Дыка быжыг тыва кавай.
Аътка, хөлгээ үңгерер-даа
Аадып кайгап өпейлээр-даа
Көшкүн кижи, көдээ чонга
Хөлчек эптиг тыва кавай.
Төрээн өдээ, өскен өөнүң
Төрел чоннуң омаа синген
Кайгап ханмас төөгүлүг
Хайыралдыг тыва кавай.
Роза Доңгак,
30.05.2025 чыл, Кара-Хөл сумузу.
Бүгү делегейниң уруглар камгалалының хүнүнде Тээли сумузунга “Өпейлеп бээр кавайым” деп делгелге эрткен
01 Июн.
