Тээли сумунуң Николай Өлзей-оол аттыг культура одаанга юбилейлиг өг-бүлелерге тускай байыр чедириишкинин чоруткан. Чыылганнарга онзагай байырлал уткуштур кожууннуң Баштыңы Роберт Аракчаа байыр чедирген.
Кожууннуң ХБАБ ажылдакчызы Надежда Хертек Кара-Хөл сумузундан 67 чыл иштинде эгин кожа чурттап чоруур, 10 ажы-төлдү кижизиткен өг-бүле Эректол Шалович биле Дарыймаа Дамбый-ооловна Иргиттерге тускай бадылга Херечилелин байырлыг байдалга тывыскан. Культура одааның “Мээн өг-бүлем” деп эртирген чурук делгелгезинге Тээли сумузунуң чурттакчызы Чечек Өпей тиилекчи болган.
Шуй сумузунуң А.Б. Чыргал-оол аттыг культура бажыңының ажылдакчылары чаштар аразында “Мээң өг-бүлем” деп чурук мөөрейин эртирген. Мөөрейге киришкен уруглар улуг сонуургал-биле киришкеннер, олар ада-иезин, өг-бүлезинде кежигүннерин чуруп көргүскеннер.
Бай-Тал сумузунуң Дмитрий Очур аттыг культура бажыңынга Өг-бүле хүнүнге тураскааткан сумунуң уран-шевер даараныр, дузаныр, ногаажылар-садчылары, чечек тарыырынга болгаш оон-даа өске чүүлдерге ынактарның чыыжын эртирген.
Чыышка келгеннер боттарының кылып билир чүүлүн, сонуургалын чугаалажып, аразында Хертек П.М кештен даараан тон, чеңижоктарын, Саая А.Х. вышивкалап, крючоктап аргаан ажылдарын, Ананды С.К. чечектерни канчаар тарып, ажаарын, Шожунчап А.Ч. чаваганы даараарын, канчаар кылырын болгаш эдилээрин, Сотпа Ш.С. крючоктап аргыырын, бичии уругларга камгалалдарның ажыын, Донгак А.Б. чаш уругнуң иезиниң иштинге кавайлангаш, төрүттүннүп келгеш ааткыышта кавайга авазының өпей ырызын дыңнап өзеринге дээш солун чугааны аразында кылып арга-дуржулгазын солушканнар. Чыышка холдан кылган ажылдарга даараан, тараан өзүмнерин, чечектерин делгеп садып алганнар. Эң бичии киржикчи 5-ки классчы Белек хоюду соктаан кулчазын сатканы чаптанчыг. Шеверлер Сотпа Ш.С. крючоктап аргыырын, Сендеңмаа Ч.И. сарлык кудуруундан бызаа мончарын эжерин мастер класстарга көргүскеннер.
Май 15-тиң хүнүнде Бүгү делегейниң өг-бүле хүнүнге тураскааткан байырлыг хемчеглер Бай-Тайга кожууннуң культура одагларынга болуп эрткен.
16 Май.
